مڈغاسکر میں نوجوانوں کی قیادت میں بغاوت، صدر اینڈری راجویلینا فرانسیسی فوجی طیارے کے ذریعے ملک سے فرار

مشرقی افریقی ملک مڈغاسکر میں نوجوانوں کی قیادت میں شروع ہونے والی عوامی بغاوت کے نتیجے میں صدر اینڈری راجویلینا اقتدار چھوڑ کر فرانسیسی فوجی طیارے کے ذریعے ملک سے فرار ہوگئے۔ یہ چند ہفتوں کے دوران دنیا میں ’جنریشن زی‘ کے احتجاج سے گرنے والی دوسری حکومت ہے۔

غیر ملکی خبر رساں ادارے رائٹرز کے مطابق، حزبِ اختلاف کے رہنما سیتنی رانڈریاناسولونائیکو نے بتایا کہ صدر ہفتے کی شب ملک چھوڑ گئے، جب فوج کے کئی یونٹس نے مظاہرین کا ساتھ دینا شروع کر دیا۔ فوجی ذرائع نے تصدیق کی کہ صدر راجویلینا فرانسیسی فوجی طیارے میں روانہ ہوئے، جبکہ فرانسیسی میڈیا نے انکشاف کیا کہ انہوں نے صدر ایمانوئل میکرون کے ساتھ ایک خفیہ معاہدہ کیا تھا۔

فرانسیسی صدر میکرون نے اس حوالے سے کہا کہ وہ اس خبر کی تصدیق نہیں کر سکتے، تاہم زور دیا کہ مڈغاسکر میں آئینی نظام کا تسلسل برقرار رہنا چاہیے۔

واضح رہے کہ 25 ستمبر کو پانی اور بجلی کی قلت کے خلاف شروع ہونے والے احتجاج نے جلد ہی بدعنوانی، مہنگائی اور سماجی ناانصافی کے خلاف عوامی بغاوت کی صورت اختیار کر لی۔ مظاہرین کا کہنا تھا کہ پچھلے 16 سالوں میں امیر طبقہ مزید امیر جبکہ عوام غریب تر ہو گئے ہیں، اور سب سے زیادہ متاثرہ طبقہ نوجوان نسل (جنریشن زی) ہے۔

ملک کے ایک اہم فوجی یونٹ کیپسیٹ نے حکومت کے احکامات ماننے سے انکار کرتے ہوئے مظاہرین میں شمولیت اختیار کر لی۔ اس کے بعد سینیٹ نے صدر کو برطرف کر کے ژاں آندرے ندرمنجاری کو عبوری صدر مقرر کر دیا۔

اقوام متحدہ کے مطابق، گزشتہ تین ہفتوں میں ہونے والے مظاہروں کے دوران کم از کم 22 افراد ہلاک ہوئے، جبکہ ہزاروں شہری دارالحکومت کے مرکزی چوک میں جمع ہو کر صدر سے فوری استعفے کا مطالبہ کر رہے ہیں۔

اعداد و شمار کے مطابق، مڈغاسکر کی آبادی کا نصف حصہ 20 سال سے کم عمر نوجوانوں پر مشتمل ہے، جبکہ 75 فیصد عوام غربت کی لکیر سے نیچے زندگی گزار رہے ہیں۔