بی ایف بائیو سائنسز نے ذیابیطس اور موٹاپے کے علاج کے لیے ’زیپٹائیڈ‘ متعارف کرادیا

پاکستان کی معروف بائیوفارما سوٹیکل کمپنی بی ایف بائیو سائنسز نے ذیابیطس ٹائپ 2 اور موٹاپے کے علاج کے لیے اپنی جدید دوا زیپٹائیڈ (Zeptide) متعارف کرادی ہے۔

کمپنی کے اعلامیے کے مطابق زیپٹائیڈ ایک امریکی ایف ڈی اے سے منظور شدہ مصنوعی پولی پیپٹائیڈ ہے جو GLP-1 اور GIP دونوں ریسپٹرز پر مؤثر انداز میں اثر انداز ہوتی ہے، جس سے خون میں شوگر لیول کو متوازن رکھنے اور وزن میں کمی میں مدد ملتی ہے۔

زیپٹائیڈ ایک پری فلڈ سرنج کی شکل میں دستیاب ہے، جو یورپی ٹیکنالوجی سے تیار کردہ بی ایف بائیو سائنسز کے جدید ترین پلانٹ میں بنائی گئی ہے۔ کمپنی کے مطابق یہ دوا محفوظ، درست خوراک کی فراہمی اور مریضوں کے لیے آسان استعمال کو یقینی بناتی ہے۔

بی ایف بائیو سائنسز نے پاکستان اسٹاک ایکسچینج کو بتایا کہ زیپٹائیڈ کی ساخت، معیار اور اثر پذیری کی جانچ امریکہ کی ایک معروف بائیولوجیکل ماس اسپیکٹرومیٹری لیبارٹری اور پاکستان کی ایک یونیورسٹی میں کی گئی، جس سے اس کی عالمی ساکھ کی توثیق ہوتی ہے۔

کمپنی نے کہا کہ زیپٹائیڈ کی تیاری آئی پی او سے حاصل ہونے والے سرمایہ کے مؤثر استعمال کا نتیجہ ہے اور یہ اقدام پاکستان کے ہیلتھ کیئر سسٹم میں سرمایہ کاری کے عزم کی عکاسی کرتا ہے۔

بی ایف بائیو سائنسز، جو پاکستان کا پہلا بائیو فارماسوٹیکل پلانٹ ہے، گزشتہ ایک دہائی سے ہیپاٹائٹس، کینسر، امراضِ قلب، ذیابیطس، نیفرالوجی اور دیگر سنگین بیماریوں کے علاج کے لیے معیاری ادویات تیار کر رہی ہے۔