فضا علی کا بولڈ ڈیٹنگ شو ’لازوال عشق‘ پر سخت ردعمل، "فحاشی کو عام کیا جا رہا ہے"

معروف اداکارہ اور میزبان فضا علی نے یوٹیوب پر نشر ہونے والے پاکستان کے پہلے رئیلٹی ڈیٹنگ شو ’لازوال عشق‘ کے بولڈ فارمیٹ کو سخت تنقید کا نشانہ بنایا ہے۔

یہ شو، جسے اداکارہ عائشہ عمر ہوسٹ کر رہی ہیں، ترکیہ کے ایک ولا میں ریکارڈ کیا گیا ہے اور اس میں چار لڑکے اور چار لڑکیاں ایک ہی چھت کے نیچے ’ہمیشہ کا پیار‘ تلاش کرنے کے مشن میں شریک ہیں۔ 

شو کے غیر روایتی انداز نے عوامی حلقوں کے ساتھ ساتھ شوبز شخصیات میں بھی بحث چھیڑ دی ہے۔

فضا علی نے اپنے بیان میں کہا کہ “اب ڈیٹنگ اور فحاشی کو ایک مہذب انداز میں دکھایا جا رہا ہے جیسے یہ کوئی عام بات ہو، یہ شوز معاشرتی اقدار اور عزت کے تصورات کو بری طرح متاثر کر رہے ہیں۔”

انہوں نے مزید کہا کہ “ہم اپنی نئی نسل کو یہ سکھا رہے ہیں کہ کیسے ڈیٹ کرنا ہے، اور یہ سب دیکھ کر نوجوان ان کی نقالی کر رہے ہیں۔ کیا ہم اپنی بیٹیوں کو یہ سکھانے کی اجازت دے سکتے ہیں؟ کیا اس سے ان کی عزت بڑھے گی؟”

فضا علی کے اس مؤقف کو سوشل میڈیا صارفین کی بڑی تعداد نے سراہا ہے اور اتفاق کیا ہے کہ ایسے شوز پاکستانی معاشرتی اقدار کے منافی ہیں۔