کینسر سے صحتیابی کے بعد سابقہ اداکارہ اریج فاطمہ نے اہلِ خانہ کے ہمراہ عمرے کی سعادت حاصل کرلی

سابقہ اداکارہ اریج فاطمہ نے کینسر سے مکمل صحتیابی کے بعد اپنے اہلِ خانہ کے ہمراہ عمرے کی سعادت حاصل کرلی۔ 

دین کے خاطر شوبز سے کنارہ کشی اختیار کرنے والی اریج فاطمہ نے عمرے کی ادائیگی کے دوران اپنے روحانی احساسات اور شکرگزاری کے لمحات سوشل میڈیا پلیٹ فارم انسٹاگرام پر مداحوں کے ساتھ شیئر کیے۔

اریج فاطمہ نے بتایا کہ کینسر کے خلاف کامیاب جدوجہد کے بعد عمرہ ادا کرنا ان کے لیے انتہائی جذباتی اور ایمان افروز لمحہ تھا۔ انہوں نے ویڈیو شیئر کرتے ہوئے لکھا،“الحمدللّٰہ، ہم نے عشاء کے بعد نہایت سکون اور اطمینان کے ساتھ عمرہ مکمل کیا اور دل سے اللّٰہ تعالیٰ کا شکر ادا کیا۔”

انہوں نے مزید بتایا کہ اگلا دن خانہ کعبہ میں عبادت کرتے ہوئے گزرا، جہاں انہیں حطیم میں نماز ادا کرنے اور کسوہ پر اپنے خاندان کے نام لکھنے کی سعادت حاصل ہوئی۔

اریج فاطمہ نے یہ بھی کہا کہ وہ اگرچہ حجرِ اسود کے قریب پہنچ گئیں، لیکن ہجوم کی وجہ سے بوسہ نہ دے سکیں — ان کے بقول،“بعض اوقات صبر اور تحمل بھی عبادت کی ایک صورت ہے۔”

واضح رہے کہ اداکارہ نے حال ہی میں مداحوں کو بتایا تھا کہ وہ کچھ عرصہ قبل کینسر کے مرض میں مبتلا رہیں، تاہم اب مکمل طور پر صحتیاب ہو چکی ہیں اور اپنی زندگی کو مثبت سمت میں آگے بڑھا رہی ہیں۔ انہوں نے مداحوں میں کینسر آگاہی کے لیے متعدد ویڈیوز بھی شیئر کی تھیں۔