قومی اسمبلی نے ڈومیسٹک وائلنس بل 2025 منظور کر لیا؛ گھریلو تشدد اور ہراسانی کو قابل سزا جرم قرار

قومی اسمبلی نے بیوی، بچوں اور گھر کے دیگر افراد کے سماجی تحفظ سے متعلق اہم قانون ڈومیسٹک وائلنس بل 2025 منظور کر لیا ہے۔ منظوری کے بعد اب یہ بل سینیٹ میں پیش کیا جائے گا۔

بل کے مطابق بیوی، بچوں یا گھر کے کسی بھی فرد کو گالی دینا، انہیں جذباتی یا نفسیاتی طور پر ہراساں کرنا قابلِ سزا جرم ہوگا۔ اس جرم کے مرتکب افراد کو تین سال تک قید اور ایک لاکھ روپے تک جرمانہ کیا جا سکے گا۔

مسودے میں کہا گیا ہے کہ بیوی، بچوں، معذور یا بزرگ افراد کا پیچھا کرنا، ان کی مرضی کے بغیر گھر میں کسی کو رکھنا یا ان کی عزتِ نفس اور پرائیویسی مجروح کرنا بھی جرم شمار ہوگا۔

اسی طرح بیوی یا کسی بھی گھریلو فرد کو جسمانی نقصان پہنچانے کی دھمکی دینا، بے بنیاد الزامات لگانا یا ان کی دیکھ بھال نہ کرنا بھی قابلِ سزا عمل قرار دیا گیا ہے۔

بل میں جنسی اور معاشی استحصال کو بھی شامل کیا گیا ہے۔ اس کا اطلاق بیوی، بچوں، بزرگوں، لے پالک افراد اور اُن ٹرانس جینڈر افراد پر ہوگا جو ایک ہی گھر میں مقیم ہوں۔

یہ بل پاکستان پیپلز پارٹی کی رکنِ قومی اسمبلی شرمیلا فاروقی نے پیش کیا تھا۔